Осягнули-зме


Strona główna Organizacja Nasze osiągnięcia


Е. Гойсак
11.11.2007

ЛЕМКІВСКА ВАТРА НА ПОДІУМІ!
ОЛ - лауреат конкурсу Pro Publico Bono

Medal 'Pro publico bono'

Попри богатство наших поглядів, конфесийни і національни відмінности, придумани поділи і реальни загорожиня асиміляції, наростаючий космополітизм, Свято лемківской культури „Лемківска ватра” в Ждини дивує свойом непереможном силом вшитких, хто співтворит тоту найбільшу в світі лемківску стрічу.

Ватру з єдной сторони звикло ся критикувати, зашмаряти єй масовіст, комерцію, отвертіст на Україну, а з другой сторони шанувати єй одвагу руйнування стереотипів, доціняти тото, же дає она право каждому заманіфестувати свою важну позицію.

Складатся вражиня, же Ватра лишатся предметом прихованой заздрости, котра в результаті родит ривалізацію і конкуренцийни імпрези в інчих сторонах. А вірте, не хотіло би ся так подумати, хоц і на хвильочку. Споминам собі ту слова сперед семох років, коли працівник Ягелоньского університету звідався мя, іщи студента, чи я ся не бою їздити на Ватру до Ждини, бо претіж можут мя там бандерівці ножом пробити! І боюся, же тоти його слова автентичнима лишаются до гнески, бо чи ми сами часом не лишамеся заручниками свойого страху, чи то не так, же акція „Вісла” юж на завше одняла деяким з нас право до гідности, віри в себе – в свою традицію, мову, Церкву!

Wyróżnienie

Я буду вірив, же Ждиньска ватра буде додавала нам одваги до особистих експресій, будуваня нового хирбета нашой лемківкой постави, позбавленого ворожнечи, нетолеранції, заздрости; до формуваня розважной еліти, яка врахує не лем рації сторін, але, што найважнійше, скомпромітує самодеструкцийни поділи в суспільним, політичнім, релігійним вимірі. Хоц видно тоти роздори медже нами, то претіж найлегше ховатися лем за теперішнє, позбавлене майбутнього status quo!

Ювілейна XXV„Лемківска ватра” в Горах, і, хто там бив, то мої слова підтвердит, била прикладом ненарушальной гармонії, погоди духа. Нихто без тоти 3-5 дни не глядав іншой оази, не потрібував іншой, бо тота Рідна Земля давала му повну насолоду співіснуваня зо своїма. То Ватра пом’янула жертви вигнаня, то до ватрян не приїжджав іщи жаден інший Президент, то ту обнялися лемки-русини-руснаки вшитких сторін!

Свідком липневого поворотнього ексодусу на Лемківщину бив цілий світ. І хоц ми сами часто не доціняме того феномену, то за нас доціняют його інши.

Так 11 листопада 2007 року в Кракові в Центрум японьского мистецтва і техніки „Manggha” Капітула IX едиції конкурсу Pro Publico Bono на найкращу громадску ініціятиву, постановила виріжнити в категорії «Культура і національна спадщина» «Лемківску ватру» в Ждини.

З широкого ґрона більше 200 ініціятив, пропонуваних громадськими організаціями, 30 трафило до півфінальной групи. По додатковій мультимедіальній презентації Капітула нагородила вибрани зголошиня в 5 категоріях: освіти, культури і національной спадщини, охорони здоровля, соціальной і харитативной помочи, міжнародньой співпраці. 

Найважнійшими критеріями оцінки ініціятив, в тім «Лемківской ватри», били: єй етичний громадский вимір, унікальніст, стабільніст імпрези, зарадніст організаторів в здобуттю диференціюваних коштів, ефективніст і прозоріст використаня коштів, співпраця з іншими регіональними і заграничними суб’єктами, промоція регіону.

Чи тоти нови горизонти над ждиньскима беріжками будут для нашого спільного лемківского духа безмежнима і ласкавима? Чи на тим живим суспільним організмі збудуєме повну зрозуміня і толеранції будучнічст?

Е. Гойсак